спорт

Қазақстан футбол құрамасы бас бапкерін ауыстырады

Қазақстан футбол құрамасы бас бапкерін ауыстырады

1

Қазақстан футбол федерациясы ұлттық құраманың бас бапкері Джон ван ’т Схиппен келісімшартты ұзартпау туралы шешім қабылдады. Нидерландтық маманның жетекшілігімен команда Ұлттар лигасында бірде-бір жеңіске жете алмай, өз тобында соңғы орын алды.

Бұл туралы 17 қарашада Қазақстан футбол федерациясының бас хатшысы Скотт Маннға сілтеме жасаған PRO KZ SPORT Telegram арнасы хабарлады.

«Джонның келісімшарты осы аптаның соңында аяқталады. Біз оны ұзартуды жоспарлап отырған жоқпыз», – деді Манн.

Енді федерация ұлттық құраманы 2028 жылғы Еуропа чемпионатының іріктеу кезеңіне дайындайтын жаңа бас бапкер іздеуге кіріседі. ҚФФ болашақ жаттықтырушымен ұзақ мерзімді келісім орнатуды көздеп отыр.

 Үш айда алты матч, жеңіс жоқ

Джон ван ’т Схип Қазақстан құрамасының тізгінін 2026 жылдың тамыз айында ұстаған. Оның жетекшілігімен ұлттық құрама УЕФА Ұлттар лигасында алты кездесу өткізіп, үшеуінде тең түсіп, үшеуінде жеңілді.

«Астана Аренада» Словакияға қарсы өткен соңғы матчта қазақстандық футболшылар екі рет есепте алға шыққанымен, төреші қосқан қосымша уақытта гол жіберіп алды. Нәтижесінде кездесу 2:2 есебімен аяқталды.

Осылайша Қазақстан құрамасы үш ұпай жинап, Ұлттар лигасының С дивизионындағы үшінші топта төртінші, яғни соңғы орынға тұрақтады.

Матчтан кейін ван ’т Схип өзінің болашағына қатысты қойылған сұраққа жауап беріп, бастапқы міндеті Ұлттар лигасының кездесулерінде команданы басқару болғанын еске салды.

62 жастағы нидерландтық маман бұған дейін Амстердамның «Аякс» клубын, сондай-ақ Грекия мен Армения ұлттық құрамаларын жаттықтырған.

Редакция «Все СМИ» желісіне қатысады.
Тегтер: футбол
Сайт Әкімшілігі
Сайт Әкімшілігі Сайт Әкімшілігі

Оқыңыз