"Қызылжар" футбол клубының бұрынғы президенті Григорий Лорияға іздеу жарияланды

Оны Қазақстанның Қаржылық мониторинг агенттігі іздестіріп жатыр. Бұл туралы Бас прокуратураның Құқықтық статистика және арнайы есепке алу жөніндегі комитетінің порталында жарияланған мәліметте көрсетілген.

Іздеу ісі 2026 жылғы 7 қарашада Солтүстік Қазақстан облысында тіркелген. Іздестіруді Қаржылық мониторинг агенттігінің бастамасымен өңірлік экономикалық тергеу департаменті жүргізіп жатыр.

Алдын ала мәлімет бойынша, Лория сеніп тапсырылған мүлікті иемдену немесе талан-таражға салу, сондай-ақ салық төлеуден жалтару күдігіне ілінген. Қылмыстық істің өзге мән-жайы әзірге жарияланған жоқ.

Григорий Лория 2014 жылдан 2024 жылғы наурызға дейін "Қызылжар" клубын басқарған. Ашық дереккөздерде 2024 жылы командада бюджет қаражатын жымқыру дерегі анықталғаны туралы ақпарат тараған. Осы іске қатысты эпизодтардың бірі бойынша клуб бухгалтері қылмыстық жауапкершілікке тартылған.

Ал Григорий Лорияның ұлы, Қазақстан құрамасының бұрынғы қақпашысы Давид Лория 2026 жылғы маусымда елордалық "Жеңіс" футбол клубының бас директоры қызметіне тағайындалған.