Ресейде дрондар шабуылынан кейін әскери өнеркәсіпке өнім шығаратын химия зауыты өртенді
29 қазанға қараған түні Ресейдің Башқұртстан Республикасындағы Стерлитамак қаласына дрон шабуыл жасады.
Шабуылдан кейін Ресейдің ірі химиялық кәсіпорындарының бірі – "Башқұрт сода компаниясы" аумағында өрт шыққаны хабарланды.
ASTRA журналистері әлеуметтік желілерде жарияланған фото және бейнематериалдарды зерттеп, түтіннің дәл осы кәсіпорын аумағынан көтерілгенін анықтаған.
Жергілікті тұрғындар қаладағы өнеркәсіптік аймақта бірнеше жарылыс болғанын хабарлады.
Стерлитамак қаласының басшысы Эмиль Шаймарданов сегіз дрон шабуылы тойтарылғанын мәлімдеді. Оның айтуынша, дрондардың сынықтары кәсіпорындардың бірінің аумағына құлаған.
"Кәсіпорынға аздаған зақым келді. Зауыт қалыпты режимде жұмыс істеп жатыр", – деді қала басшысы.
Алайда ол нақты қай кәсіпорын зардап шеккенін атамаған.
Әскери өнеркәсіп үшін маңызды зауыт
"Башқұрт сода компаниясы" – Ресейдегі ең ірі химиялық кешендердің бірі. Кәсіпорын кальцийленген және ас содасын, тұз қышқылын, дихлорэтан және басқа да химиялық өнімдер шығарады.
ASTRA мәліметінше, зауыт Ресейдің Өнеркәсіп және сауда министрлігінің қорғаныс кәсіпорындары тізіліміне енгізілген.
Кәсіпорын Ресейде терефталоилхлорид өндіретін жалғыз зауыт саналады. Бұл химиялық қосылыс жоғары беріктігі бар синтетикалық талшықтар мен арамид материалдарын жасауға пайдаланылады.
Мұндай материалдар оқ өтпейтін кеудешелер, әскери каскалар, брондалған техника мен авиацияның қорғаныс элементтерін өндіруге қажет.
Сондықтан аталған кәсіпорын Ресейдің әскери-өнеркәсіп кешені үшін маңызды өндіріс орындарының бірі болып есептеледі.
Ресейге жаппай дрон шабуылы жасалды
29 қазанға қараған түні Ресейдің бірнеше өңірінде ұшқышсыз ұшу аппараттарына байланысты қауіп жарияланды.
Ресей Қорғаныс министрлігінің мәліметінше, ел аумағында 1214 дрон атып түсірілген. Бұл деректі тәуелсіз түрде растау мүмкін болмады.
Мәскеу мэрі Сергей Собянин де Ресей астанасына бағытталған жүздеген дрон туралы мәлімдеді. Шабуылдарға байланысты Мәскеудің бірнеше әуежайында ұшақтардың ұшуы мен қонуына уақытша шектеу қойылды.
Башқұртстан астанасы Уфа әуежайының жұмысы да уақытша шектелді.
Айта кетейік, "Башқұрт сода компаниясы" бұған дейін де дрондар шабуылына ұшыраған. 27 тамызда кәсіпорын аумағында өрт шыққаны хабарланған еді.
29 қазандағы шабуылдан кейін зауыттың нақты қаншалықты зақымданғаны және өндірістік жабдықтарға зиян келген-келмегені әзірге белгісіз.
