Ресейдегі Wildberries қоймаларының бүлінуі Қазақстанға жеткізуге әсер етуі мүмкін
Ресейде дрон шабуылдары Wildberries маркетплейсін дамытып отырған RWB компаниясының бірқатар логистикалық нысандарына әсер етті.
«Коммерсантъ» басылымының мәліметінше, зақымданған нысандардың жалпы ауданы 552 мың шаршы метрді құрайды. Бұл компанияның бүкіл логистикалық инфрақұрылымының шамамен 10 пайызына тең. Әңгіме Мәскеу облысындағы Электросталь, Тамбов облысындағы Котовск, Краснодар және Ставрополь өлкесіндегі Невинномысск қалаларындағы кешендер туралы болып отыр. Сонымен қатар, Колединодағы логистикалық кешеннің қызметкерлері зымыран қаупіне байланысты эвакуацияланған.
Басылымның жазуынша, төрт нысанды толық қалпына келтіру қажет болуы мүмкін. Ал Колединодағы кешен жұмысын жалғастырып жатыр, Котовскідегі қойманы жақын арада қайта ашу жоспарланған.
Осылайша, шамамен 444 мың шаршы метр қойма алаңы уақытша пайдаланудан шығуы мүмкін. Бұл Wildberries логистикалық қуатының шамамен 8 пайызына тең.
Жылжымайтын мүлік нарығындағы сарапшылардың бірі дәл осындай көлемдегі қоймаларды жабдықтарын есептемегенде қайта салу құнын 35,5 млрд рубльге бағалаған. Ал Remain компаниясының қойма және өндірістік жылжымайтын мүлік департаментінің директоры Александр Федоров өрттен зардап шеккен Wildberries мүлкінің құнын 60 млрд рубль деп есептейді.
Сарапшылардың пікірінше, логистикалық қуаттың қысқаруы жеткізу мерзіміне, тауар қорларын бөлудің тиімділігіне және тасымал бағыттарының тұрақтылығына әсер етуі мүмкін.
Мәселені шешудің бір жолы ретінде жүк ағындарын басқа өңірлерге қайта бөлу қарастырылып отыр. Сарапшылардың айтуынша, Wildberries тауарларды Еділ бойы, Орал және Сібірдегі қоймаларға көбірек бағыттап, сондай-ақ тапсырыстардың бір бөлігін сатушылардың өз қоймаларынан жөнелту үлгісін кеңінен қолдануы мүмкін.
Осының салдарынан қазақстандық сатып алушылар тауарлардың жекелеген санаттары бойынша жеткізу мерзімінің ұзаруына, тапсырысты беру уақытының кейінге шегерілуіне немесе Ресейдегі зақымданған қоймаларда сақталған кейбір өнімдердің уақытша қолжетімсіз болуына тап болуы ықтимал.
Қазақстандық сатушылар үшін де қауіп бар. Егер маркетплейс тауар ағындарын қоймалар арасында қайта бөлсе, қабылдау және жеткізу мерзімдері өзгеріп, логистикалық бағыттар қайта қаралуы, сондай-ақ сұрыптау орталықтарына түсетін жүктеме артуы мүмкін. Wildberries-тің Қазақстанға арналған нұсқаулығына сәйкес, сатушылар платформаның қоймалары мен сұрыптау орталықтары арқылы жұмыс істейді. Ал FBW үлгісі бойынша маркетплейс тауарды сақтау, жинақтау, сатып алушыға жеткізу және қайтарылған өнімдерді өңдеу міндетін өз мойнына алады.
