Сот Бишімбаевтың анасының Назым Қахарманға қарсы талабын жартылай қанағаттандырды
Астанада сот Қуандық Бишімбаевтың анасы Альмира Нұрлыбекованың бұрынғы келіні Назым Қахарманға қарсы миллиондаған теңгелік талабына қатысты шешім шығарды.
Іс сенімгерлік басқаруға берілген коммерциялық нысанды жалға беруден түскен қаражатқа қатысты. Сот материалдары бойынша, Альмира Нұрлыбекова нысанды Назым Қахарманға 2029 жылдың 31 қазанына дейін сенімгерлік басқаруға берген.
Талапкер тарапы соттан 14 074 771 теңге, сондай-ақ мемлекеттік баж бен өкіл қызметіне кеткен шығындарды өндіріп беруді сұраған.
Сот талапты ішінара қанағаттандырып, Назым Қахарманның жеке кәсіпкерлігінен Альмира Нұрлыбекованың пайдасына 6 665 391 теңге өндіру туралы шешім қабылдады. Бұған қоса 66 654 теңге мемлекеттік баж және 666 539 теңге өкіл шығыны өтелуге тиіс. Жалпы сома шамамен 7,4 млн теңгені құрайды.
Сот қалған талаптарды қанағаттандырмады. Шешім шығарылған сәтте заңды күшіне енбеген, тараптардың оған шағымдануға құқығы бар.
