Сот экс-министр Бейсембаевтың Гүлнар Бажкеноваға қарсы талабын ішінара қанағаттандырды

Алматының Бостандық аудандық соты бұрынғы оқу-ағарту министрі Ғани Бейсембаевтың Orda.kz басылымының бұрынғы бас редакторы Гүлнар Бажкеноваға қарсы азаматтық талап арызын ішінара қанағаттандырды. Бұл туралы Азаттық Азия жазды.

Экс-министр журналистен 20 миллион теңге моральдық өтемақы талап еткен. Алайда сот 500 мың теңге өндіріп алу туралы шешім шығарды. 

Сот дауына Бажкенованың 2025 жылғы 7 қазанда әлеуметтік желілерде жариялаған жазбалары себеп болған. Журналист бұрынғы оқу-ағарту министрі Ғани Бейсембаев пен бұрынғы сыртқы істер министрі Мұрат Нұртілеудің арасында туыстық байланыс бар екенін және Бейсембаевтың қызметте жоғарылауына осы байланыстың ықпал еткенін жазған.

Бейсембаев бұл мәліметтерді шындыққа сәйкес келмейді және өзінің ар-намысы мен іскерлік беделіне нұқсан келтіреді деп есептеп, сотқа жүгінген.

Ол Бажкеновадан жарияланымдарды өшіруді, ақпаратты теріске шығаруды және 20 миллион теңге моральдық өтемақы төлеуді талап еткен.

5 қарашада судья Айдар Өтебеков талап арызды ішінара қанағаттандырды.

Сот Бажкенованың Бейсембаев пен Нұртілеудің туыстық немесе құдандалық байланысы бар екені, сондай-ақ Бейсембаевтың қызметтік өсуіне осы қатынастар ықпал еткені туралы мәліметтерін шындыққа сәйкес келмейді деп таныды.

Сот шешіміне сәйкес, Бажкенова шешім заңды күшіне енгеннен кейін бес жұмыс күні ішінде 2025 жылғы 7 қазандағы жарияланымдарын өшіріп, Facebook, Instagram және Telegram парақшаларында теріске шығару жариялауға міндеттелді.

Сонымен қатар журналистен Бейсембаевтың пайдасына 500 мың теңге моральдық өтемақы және 7 162 теңге мемлекеттік баж өндірілетін болды. Талаптың қалған бөлігі қанағаттандырылған жоқ.

Сот процесі кезінде талапкер өкілі Бажкеновадан бұрынғы министрдің кәсібилігі туралы материал жариялауды да талап еткен. Алайда соттың қорытынды шешімінде мұндай міндет көрсетілмеген.

Бажкенова талап арызбен келіспеген. Оның қорғаушысы Эльдар Мұсаев Азаттық Азияға берген түсініктемесінде моральдық өтемақы көлеміне қатысты талаптың жеткілікті негізделмегенін айтқан.

Бұған дейін, 2026 жылғы 30 маусымда, Алматының әкімшілік соты осы жарияланымдарға байланысты Бажкенованы жала жабу бойынша кінәлі деп танып, 778 мың теңге айыппұл салған.

Еске салайық, биыл тамызда Бажкенова басқа қылмыстық іс бойынша сегіз жылға бас бостандығынан айырылған. Кәмелетке толмаған баласының болуына байланысты жазаны өтеу екі жылға кейінге қалдырылған.