Тегерандағы жерлеу рәсімі: Хаменейдің үш ұлы көпшілік алдына шықты

Олардың әкесі Әли Хаменей биыл 28 ақпанда АҚШ пен Израильдің Иранға қарсы әскери операциясы кезінде жасалған әуе шабуылынан, отбасының тағы бірнеше мүшесімен бірге қаза тапқан болатын. Кейін бірнеше айға созылған соғыс Таяу Шығыста көптеген адамның қазасына және ауқымды қирауға алып келді.

Ислам Республикасы Хаменейді шығарып салу рәсімдерін бір апта бойы өткізіп, оны мемлекетке адалдық пен ислам революциясына берілгендіктің көрінісі ретінде ұйымдастырып отыр. Жоспарға сәйкес, оның мәйіті көршілес Ирактағы шииттердің қасиетті орындарына да апарылады.

Жоғары лауазымды ирандық шенеуніктер мен шетелдік делегациялар қоштасуы үшін бір күн бойы жабық ғимаратта тұрған Хаменейдің табыты сенбі күні әйнек қаптаманың ішінде көпшілікке көрсетілді.

Жаңа көшбасшы көрінбеді

28 ақпандағы шабуыл кезінде жараланған делінетін Можтаба Хаменей әлі күнге дейін жұрт алдына шыққан жоқ, оның жаңа суреттері де жарияланған емес.

Reuters агенттігінің дереккөздерінің мәліметінше, Можтабаның беті ауыр жарақат алған, сондай-ақ бір немесе екі аяғы қатты зақымданған.

Жексенбі күні Тегерандағы Мосалла кешеніне ондаған мың аза тұтушы, әскери қызметкерлер, діни медресе студенттері және қарапайым тұрғындар ағылды. Олар АҚШ пен Израильден кек алуға шақырған ұрандар жазылған жалауларды көтеріп жүрген.

Қоштасу рәсіміне Иран президенті Масуд Пезешкиан мен парламент төрағасы Мохаммад Багер Галибаф та қатысып, табыттардың жанында дұға оқыды.

Келушілердің көп болуына байланысты рәсім бір сағатқа ұзартылып, түнгі сағат 22:00-ге дейін жалғасты.

Иран метросының мәліметінше, сенбі кешінен жексенбі таңына дейін қала орталығына 7 миллион жолаушы тасымалданған.

Жерлеу бірнеше қалада өтеді

Дүйсенбі күні Тегеранның орталығында үлкен аза шеруі өтеді. Одан кейін сейсенбі күні рәсімдерді өткізу үшін мәйіт Ирандағы шиит дінбасыларының орталығы саналатын Құм қаласына жеткізіледі.

Сәрсенбі күні мәйіт ұшақпен Ирактың шииттер үшін қасиетті саналатын Наджаф және Кербала қалаларына апарылады. Бейсенбі күні қайтадан Иранға әкелініп, Мешһедтегі аза шеруінен кейін Имам Риза кесенесінің маңына жерленеді.

Бейбіт келіссөздер уақытша тоқтады

АҚШ президенті Дональд Трамп Axios басылымына берген сұхбатында жерлеу рәсімдеріне байланысты Иранмен бейбіт келіссөздердің бір аптаға тоқтатылғанын айтты.

Вашингтонмен жасалған келісімге сәйкес, төрт айға созылған соғыс атысты тоқтату туралы келісім арқылы аяқталған. Иран билігінің айтуынша, бұл келісім елге үлкен экономикалық пайда әкеледі және олар оны қуатты мемлекетке қарсы қол жеткізілген жеңіс ретінде бағалайды.

Соғыс барысында 3000-нан астам адам қаза тапты. Олардың арасында Иранның жоғары лауазымды саясаткерлері мен әскери қолбасшылары болды. Әскери базалар мен ірі инфрақұрылым нысандары қирап, миллиардтаған доллар шығын келтірілді.

Сонымен қатар Иран АҚШ-тың аймақтағы әскери базаларына соққы беріп, Парсы шығанағындағы араб мемлекеттеріне залал келтіргенін және Ормуз бұғазына бақылау орнатқанын мәлімдейді. Бұл әлемдік энергия бағасының күрт өсуіне әсер етті. Дональд Трамптың айтуынша, дәл осы жағдай бейбіт келісімге қол жеткізу процесін жеделдетуге себеп болған.

Өткен айда жасалған уақытша келісім Иранның шетелде бұғатталған миллиардтаған долларлық активтерін босатуды және ел экономикасына ауыр салмақ түсірген қаржылық санкциялардың бір бөлігін жеңілдетуді көздейді.