Тоқаев EXPO орталығында шетелдік лидерлерді қарсы алды
Астанада өтіп жатқан #RES2026 өңірлік экологиялық саммитіне келген шетелдік делегация басшыларын Қазақстан Президенті Қасым-Жомарт Тоқаев EXPO көрме орталығында қарсы алды. Бұл туралы Ақорда хабарлады.
Саммитке қатысушы мемлекет басшылары мен үкімет өкілдері елордаға келіп, пленарлық отырысқа қатысуда.
Ауқымды халықаралық алаң БҰҰ және өзге де ұйымдармен бірлесіп ұйымдастырылған. Оның басты мақсаты – Орталық Азия елдері үшін экология, су және жер ресурстарын басқару, биоалуантүрлілікті сақтау бағытында ортақ саясат қалыптастыру.
Пленарлық отырыста Қазақстан Президенті Қасым-Жомарт Тоқаевпен бірге Қырғызстан, Өзбекстан, Тәжікстан, Түрікменстан, Армения, Моңғолия және Грузия президенттері, сондай-ақ Әзербайжан премьер-министрі мен БҰҰ өкілдері сөз сөйлейді.
Еске салайық, RES-2026 саммиті 22-24 сәуір аралығында өтеді. Жиынға шамамен 1500 делегат қатысады деп болжанған.
