Тоқаев жұмыс нәтижесі нашар министрлер мен әкімдерді жауапқа тарту жүйесін жойды

Президент Қасым-Жомарт Тоқаевтың жарлығы 2026 жылғы 21 қазанда күшіне енді. Құжат мемлекеттік органдардың жұмысын бағалау және олардың рейтингін жасау жөніндегі бұрынғы ережелердің күшін жояды.

Бұл жүйе Нұрсұлтан Назарбаевтың тұсында енгізілген. Егер мемлекеттік орган рейтингте соңғы үш орынның бірін иеленсе немесе оның жауапкершілігіндегі сала көрсеткіштері үш жыл қатарынан нашарласа, Президент әкімшілігі сол орган басшысын жауапқа тарту мәселесін көтере алатын.

Алайда бұл тәртіп министрлер мен әкімдерді автоматты түрде қызметінен босатуды көздемеген.

Мемлекеттік органдардың жұмысын бағалау тәсілдерін қайта қарауды Жоғары аудиторлық палата ұсынған. 2025 жылы палата Қазақстанда мемлекеттік органдарды бағалаудың тоғыз түрлі форматы қолданылғанын, олардың кейбірі бірін-бірі қайталайтынын хабарлаған.

Дегенмен бұрынғы жүйенің жойылуы министрліктер мен әкімдіктердің қызметіне бақылау тоқтайды дегенді білдірмейді.

Жоғары аудиторлық палата мемлекеттік органдардың даму жоспарлары мен бюджеттік бағдарламалардың орындалуын бағалауды жалғастырады.

Ал жаңа бағалау жүйесінің нақты қалай жұмыс істейтіні бекітілген ережелер негізінде нақтылануы тиіс.