Украина Ресейдегі зымыран отынын өндіретін зауытқа соққы жасады
Украина әскері Ресейдің Ростов облысында орналасқан зымыран отынын өндіретін кәсіпорынға зымырандармен және дронмен соққы жасағанын мәлімдеді.
Шабуыл салдарынан зауыттың төрт өндірістік цехы зақымданып, қоймада өрт шыққан.
Украина Қарулы күштері Бас штабының мәліметінше, шабуыл 31 қазанға қараған түні Ростов облысының Каменск-Шахтинский қаласында орналасқан "Каменский комбинатына" жасалған.
Әскери операцияға ұшқышсыз ұшу аппараттары мен Украина Әскери-теңіз күштерінің "Нептун" жағалаулық зымыран кешендері пайдаланылған.
Украина тарапының хабарлауынша, соққы нәтижесінде кәсіпорынның дайын өнім сақталатын қоймасында өрт шығып, төрт өндірістік цех зақымданған.
Зауытта қандай өнім өндіріледі?
"Каменский комбинаты" – Ресейдің әскери-өнеркәсіп кешеніне кіретін кәсіпорындардың бірі.
Украина Бас штабының мәліметінше, зауытта "Ураган", "Смерч" және "Торнадо-С" реактивті дүркіндете ататын жүйелеріне арналған қатты зымыран отыны өндіріледі.
Сонымен қатар кәсіпорын басқа да зымыран жүйелері мен авиациялық қару-жараққа қажетті материалдар шығарады.
Украина әскери басшылығы мұндай өндіріс орындарына жасалған соққылар Ресей армиясының зымырандық қару-жарақпен қамтамасыз етілуіне әсер етуі мүмкін екенін мәлімдеді.
Ресей армиясының тағы төрт қоймасына соққы жасалған
Украина Бас штабы осы түні Ресей әскерінің материалдық-техникалық жабдықтау қоймаларына да шабуыл жасалғанын хабарлады.
Атап айтқанда, Донецк облысындағы Харцызск пен Докучаевск, Запорожье облысындағы Нововасильевка және Луганск облысындағы Новоайдар елді мекендері маңындағы төрт әскери қойма нысанаға алынған.
Украина тарапы бұл операциялар Ресейдің әскери әлеуетін әлсіретуге бағытталғанын мәлімдеді.
Әзірге Ресей билігі "Каменский комбинатына" жасалған шабуыл мен кәсіпорынның зақымданғаны туралы мәліметті ресми түрде растаған жоқ.
