Ұлыбритания пилотсыз суасты аппаратынан алғаш рет ауыр торпеда ұшырды

 Лондон бұл сынақты Еуро-Атлантика қауіпсіздігін күшейту және НАТО-ның суасты кеңістігіндегі мүмкіндігін арттыру бағытындағы маңызды қадам деп атады. 

Сынақ 13 қыркүйекте Шотландиядағы British Underwater Test & Evaluation Centre орталығында өткен. Ұлыбритания Корольдік әскери-теңіз күштерінің 12 метрлік XV Excalibur пилотсыз суасты аппараты америкалық Mk 48 ауыр торпедасын ұшырған. Бұл – Ұлыбритания мен АҚШ үшін экипажсыз суасты платформасынан мұндай қаруды қолданудың алғашқы тәжірибесі. 

XV Excalibur – Плимутта жасалған эксперименттік аса ірі пилотсыз суасты аппараты. Ол 2025 жылдан бері теңіз сынақтарынан өтіп келеді. Жоба автономды суасты жүйелерінің мүмкіндіктерін, соның ішінде өздігінен шешім қабылдау, сенсорларды пайдалану және әртүрлі әскери тапсырмаларды орындау технологияларын дамытуға арналған.

Сынақ АҚШ, Ұлыбритания және Австралияның AUKUS қорғаныс серіктестігі аясында жүргізілді. Ұлыбритания үкіметінің мәліметінше, жаңа технология болашақта кемелер мен тереңде жүзетін сүңгуір қайықтарға қарсы әрекет етуге мүмкіндік береді. Лондон оны НАТО-ның суасты кеңістігіндегі басымдығын күшейтетін технологиялық жетістік деп бағалап отыр.

Ресей факторы

Сынақ Ұлыбританияның автономды әскери жүйелерге инвестициясын күшейтіп жатқан кезеңіне тұспа-тұс келді. 16 қыркүйекте британ әскері ұрыс жағдайында бірнеше дронды бір мезгілде басқаратын «дрондар тобын» сынағанын хабарлады. Сондай-ақ Лондон ұзақ қашықтыққа ұшатын барлау дрондарына 400 млн фунтқа дейін инвестиция салып, мыңнан астам шағын дрон сатып алуды жоспарлап отыр.

Ұлыбритания соңғы уақытта Ресейді Еуропа қауіпсіздігіне төнетін негізгі қатерлердің бірі ретінде бірнеше рет атап келеді. 17 қыркүйекте елдің ЕҚЫҰ-дағы әскери өкілі Ресейден төнетін қауіп Украина шекарасымен шектелмейтінін мәлімдеді.

Дегенмен XV Excalibur сынағын «Ұлыбритания Ресейге қарсы соғысқа тікелей дайындалып жатыр» деп сипаттау дәл болмайды. Ресми Лондон сынақты нақты Ресейге қарсы операция деп жариялаған жоқ. Ұлыбритания үкіметі оның мақсатын қарсыластарды тежеу, маңызды инфрақұрылымды қорғау және НАТО мен AUKUS елдерінің әскери-технологиялық мүмкіндігін арттыру деп түсіндіреді.