Қоғам

Ұлттық банк базалық мөлшерлемені 17,00% деңгейінде белгіледі

Қазақстан Республикасы Ұлттық Банкінің Ақша-кредит саясаты комитеті базалық мөлшерлемені жылдық 17% деңгейінде белгілеу туралы шешім қабылдады.

ұлттық банк

Пайыздық дәліз ±1 пайыздық тармақ деңгейінде сақталды. Реттеушінің мәліметінше, шешім инфляцияның баяулау үрдісі, макроэкономикалық көрсеткіштердің жаңартылған бағасы және инфляциялық тәуекелдердің төмендеуіне байланысты қабылданған.

Мамыр айының қорытындысы бойынша жылдық инфляция 10,4%-ды құрады. Бұл өткен жылдың қыркүйегінде тіркелген 12,9%-дық ең жоғары көрсеткіштен 2,5 пайыздық тармаққа төмен.

Азық-түлік инфляциясы 10,7%-ға дейін баяулаған. Бұған жеміс-жидек пен көкөніс бағасының тұрақтануы, әлеуметтік маңызы бар азық-түлік тауарлары мен кейбір импорттық өнімдердің қымбаттау қарқынының төмендеуі әсер еткен.

Сонымен қатар азық-түлікке жатпайтын тауарлар инфляциясы 11,7% деңгейінде сақталды. Ұлттық банк мұны теңге бағамының нығаюымен және тұтынушылық несиелеудің баяулауымен байланыстырады.

Қызмет көрсету саласындағы баға өсімі де бәсеңдеп, 8,7%-ды құрады. Бұған тұрғын үй-коммуналдық қызмет тарифтерінің өсу қарқынының төмендеуі және тұтынушылық сұраныстың тұрақтануы себеп болған.

Ұлттық банк 2026 жылға арналған инфляция болжамын 9–11% аралығына дейін төмендетті. Бұған дейін бұл көрсеткіш 9,5–11,5% деңгейінде болжанған еді.Реттеуші биыл инфляцияның бір таңбалы көрсеткішке дейін төмендеуін күтеді. Болжам бойынша, 2027 жылы инфляция 5,5–7,5%-ға дейін баяулап, 2028 жылы 5%-дық мақсатты деңгейге жетуі мүмкін.

Сонымен қатар Ұлттық банк 2026 жылға арналған экономикалық өсім болжамын жақсартты. Енді Қазақстанның жалпы ішкі өнімі 4,5–5,5% аралығында өседі деп күтілуде.

Дегенмен реттеуші инфляцияға әсер ететін тәуекелдер әлі де сақталып отырғанын атап өтті. Олардың қатарында ішкі сұраныстың артуы, тарифтік реформалар, жанар-жағармай бағасының өзгеруі және әлемдегі геосаяси тұрақсыздық бар.

Ұлттық банктің базалық мөлшерлеме бойынша келесі жоспарлы шешімі 2026 жылғы 24 шілдеде жарияланады.

Редакция «Все СМИ» желісіне қатысады.
Сайт  Әкімшілігі
Сайт Әкімшілігі Сайт Әкімшілігі

Оқыңыз