Ұлыбритания Дариға Назарбаева мен Тимур Құлыбаевтың зәулім жылжымайтын мүліктерін жариялады
Лондонда Қазақстанның бұрынғы президенті Нұрсұлтан Назарбаевтың қызы мен күйеу баласына тиесілі сәнді зәулім үйлер мен пәтерлер бар екені анықталды.
Ұлыбритания үкіметі Қазақстанның бұрынғы президенті Нұрсұлтан Назарбаевтың Лондондағы 40,3 миллион фунт стерлинг (шамамен 50 миллион доллар) тұратын оффшорлық компанияларда тіркелген мүлкі туралы ақпаратты жария етті. Бұл туралыTimes басылымы хабарлады.
Ресейдің Украинаға басып кіруінен кейін Ұлыбритания шенеуніктері енгізген жаңа ережелер елде мүлкі бар шетелдік компанияларды бастапқы иесін жариялауды талап етеді. Бұл Ұлыбританияда оффшорлар арқылы сәнді зәулім үйлерге иелік ететіндер туралы ақпаратты ашу мақсатында жасалды. Бұрын бұл ақпарат құпия болып саналған.
Ұлыбритания үкіметінің реестріне сәйкес, Нұрсұлтан Назарбаевтың үлкен қызы Дариғаның Лондонның солтүстігінде құны 9,3 миллион фунт стерлинг тұратын үйі мен Челсиде құны 31 миллион фунт стерлинг тұратын екі пәтері бар. Мүліктер Панамадағы Tropicana Assets Foundation және Villa Magna Foundation-қа берілген.
Сондай-ақ, Назарбаевтың күйеу баласы Тимур Құлыбаевтың 2007 жылы ханзада Эндрюден бұл мүлікті оффшорлық компания арқылы 15 миллион фунтқа сатып алғаны атап өтілген.
Сондай-ақ Құлыбаевтың Гайд-парк маңындағы 1,5 миллион фунт стерлингтік атқорасы бар.
Жақында Ұлыбритания ақшаны жымқырумен және елдегі активтерді жасырын иеленумен күресуге бағытталған заңнаманы қатайту бойынша белсенді жұмыс жүргізіп жатыр. Бұл шаралар британдық меншікке иелік ететін оффшорлық компаниялардың түпкілікті иелері туралы ақпаратты міндетті түрде ашуды қамтиды.
Құлыбаев «Қазақстанның ең ықпалды 50 бизнесмені – 2022» рейтингінде бірінші орында тұр. Сондай-ақ ерлі-зайыптылар «Қазақстанның ең бай 50 кәсіпкері – 2022» тізімінде екінші орынға жайғасқан.
2020 жылы Қазақстанның бұрынғы президентінің отбасының Испания, Франция, Швейцария, АҚШ, Чехия және Ұлыбританияда жалпы құны 785 миллион доллардан кем емес зәулім үйлері бар екені хабарланған болатын.
