Wildberries Қазақстаннан 100 мың шаршы метр қойма іздеп жатыр
Wildberries маркетплейсі Қазақстан аумағынан жалпы көлемі шамамен 100 мың шаршы метр болатын қойма орындарын іздеуге кірісті.
Компания Ресейдегі қоймаларға жасалған дрон шабуылдарынан кейін сатушылардың тауарларының бір бөлігін Қазақстандағы логистикалық орталықтарға көшіруі мүмкін.
Бұл туралы «Коммерсантъ» жылжымайтын мүлік нарығындағы төрт дереккөзге сілтеме жасап хабарлады. Олардың бірінің айтуынша, Wildberries-ті дамытып отырған RWB тобы Қазақстандағы қолжетімді қоймалардың басым бөлігін жалға алуға дайын.
Алайда компанияға мұндай көлемдегі біртұтас қойманы табу оңай болмайды. Қазір Қазақстанда шамамен 130 мың шаршы метр сапалы бос қойма алаңы бар болғанымен, олар әртүрлі қалаларда орналасқан. Ал көлемі 100 мың шаршы метр болатын бірде-бір бос қойма кешені жоқ.
RWB компаниясының баспасөз қызметі қоймаларды шұғыл іздеп жатқаны туралы ақпаратты тікелей растаған жоқ. Компания өкілдерінің айтуынша, Wildberries жұмыс істейтін елдердегі логистикалық инфрақұрылымды жоспарлы түрде дамытып келеді.
Қазіргі таңда Wildberries Алматыда аумағы 100 мың шаршы метрден асатын жаңа логистикалық кешен салып жатыр. Ал Астанада көлемі 160 мың шаршы метр болатын тағы бір қойма құрылысы жүріп жатыр. Оны 2027 жылы пайдалануға беру жоспарланған.
Сарапшылардың бағалауынша, Қазақстандағы қоймаларды жалға алу құны Мәскеудегі бағамен шамалас. Елдегі орташа жалдау ақысы айына бір шаршы метріне 5,18 мың теңгені құрайды.
Еуразиялық экономикалық одақтың (ЕАЭО) бірыңғай кедендік кеңістігі тауарларды Ресей мен Қазақстандағы логистикалық орталықтар арасында еркін тасымалдауға мүмкіндік береді. Соның арқасында қазақстандық қоймаларда ресейлік сатушылардың тауарлары, ал Ресейдегі қоймаларда қазақстандық кәсіпкерлердің өнімдері сақтала алады.
Басылымның мәліметінше, Ресейдегі қойма иелері жаңа шабуылдардың қайталану қаупіне байланысты Wildberries-пен жаңа жалдау келісімдерін жасаудан бас тарта бастаған. Сонымен қатар өнеркәсіптік нысандарға арналған стандартты сақтандыру полистері дрон шабуылдарынан келген шығынды әдетте өтемейді.
