Атырауда 16 жастағы оқушы қыз жоспарлы отадан кейін көз жұмды
Атырау облыстық балалар ауруханасында мұрын қуысындағы полипті алып тастау үшін жоспарлы ота жасалған 16 жастағы оқушы қыз қайтыс болды.
Отадан шамамен бір сағат өткен соң оның жағдайы күрт нашарлап, жансақтау бөліміне ауыстырылған. Дәрігерлердің мәліметінше, асқынуға мұрынға салынған тампонның орналасуына қатысты мәселе себеп болған. Қыз бір сәтте өздігінен тыныс ала алмай қалған.
Медицина қызметкерлері тампонды алып тастағанымен, оқушы 18 күн бойы жансақтау бөлімінде жатып, көз жұмды. Марқұмның ата-анасы қызының өліміне медицина қызметкерлерінің әрекеті себеп болуы мүмкін деп есептейді.
Атырау облысының денсаулық сақтау басқармасы оқиғаға байланысты арнайы комиссия құрылғанын мәлімдеді. Комиссия медициналық көмектің сапасын және асқынудың нақты себептерін анықтайды.
Ведомство тексеру аяқталғанға дейін оқиғаға қатысты алдын ала қорытынды жасауға негіз жоқ екенін атап өтті.
