Беларусь 25 саяси тұтқынды босатады, АҚШ екі компанияға салынған санкцияны алып тастайды
Беларусь билігі АҚШ президентінің арнайы өкілі Джон Коулдың Минскіге сапарынан кейін 25 тұтқынды босатуға кірісті.
Бұл туралы 16 қыркүйекте Беларусьтің мемлекеттік БелТА агенттігі Коулдың сөзіне сілтеме жасап хабарлады.
«Ізгі ниеттің белгісі ретінде Беларусь 25 адамды босатады», – деді АҚШ президентінің арнайы өкілі.
Өз кезегінде АҚШ Беларусьтің екі кәсіпорнына салынған санкцияларды алып тастамақ. Олар – лак-бояу өнімдерін шығаратын «Лакокраска» кәсіпорны және мемлекеттік орман өнеркәсібі концерні «Беллесбумпром».
Коулдың айтуынша, АҚШ пен Беларусь келіссөздер барысында «айтарлықтай ілгерілеуге» қол жеткізіп, аралық келісімге келген.
«Тараптар шешілмеген мәселелер бойынша жұмысты жалғастырады. Барлық мәселе шешіліп, екі тарап та келіскеннен кейін адамдарды босату және Беларусь компанияларына салынған санкцияларды алып тастау жалғасады», – деді ол.
Тұтқындардың туыстарына алдын ала хабарланған
«Вясна» құқық қорғау орталығының мәліметінше, кейбір тұтқындардың туыстары 15 қыркүйек кешінде жақындарын 16 қыркүйек таңертең түзеу колонияларынан алып кете алатыны туралы хабар алған.
Джон Коулдың Минскіге сапары 15 қыркүйекте басталды. Сол күні ол Беларусь басшысы Александр Лукашенкомен кездесті.
Бұған дейінгі АҚШ–Беларусь келіссөздері де саяси тұтқындарды босатумен аяқталған. 2025 жылғы желтоқсанда 123 адам, ал 2026 жылғы наурызда тағы 250 саяси тұтқын бостандыққа шыққан. АҚШ бұған жауап ретінде Беларуське қатысты бірқатар санкцияларды жеңілдеткен.
2025 жылғы желтоқсанда босатылғандардың арасында Беларусь оппозициясының өкілдері Мария Колесникова мен Виктор Бабарико, сондай-ақ Нобель бейбітшілік сыйлығының лауреаты Алесь Беляцкий болған.
«Вясна» құқық қорғау орталығының дерегінше, 2026 жылғы тамыздың соңында Беларусь түрмелерінде әлі де 889 саяси тұтқын отырған.
