Германиядағы қанды шабуылдан алты адам қаза тапты

 Шабуылды жасады деген күдікпен 45 жастағы Германия азаматы ұсталды. Алдын ала мәлімет бойынша, қанды оқиғаға оның қызына қамқоршылық мәселесіне байланысты туындаған дау себеп болған.

29 маусым күні Штаде қаласының орталығындағы балалар мен жастар мекемесінде белгісіз ер адам оқ жаудырып, төрт әйел мен екі ер адамды атып өлтірген. Қаза тапқандардың барлығы осы мекеменің немесе кәмелетке толмағандар ісі жөніндегі жергілікті қызметтің қызметкерлері болған.

Төменгі Саксонияның ішкі істер министрі Даниэла Беренс бұл шабуылды «саяси немесе экономикалық себептері жоқ, суыққанды түрде жасалған зорлық-зомбылық әрекеті» деп бағалады.

Тергеу мәліметінше, күдікті шабуыл болған күні үш айлық қызына қамқоршылық мәселесін талқылау үшін осы мекемеге шақырылған. Сәби мен оның 34 жастағы анасы қазіргі уақытта осы мекемеде уақытша тұрып жатқан. Оқиға кезінде екеуі де зардап шекпеген.

Көршілес Люнебург қаласы полициясының басшысы Катрин Шуольдің айтуынша, күдікті шабуылға дейін қызының болашағы мен қамқорлығы мәселесіне қатысты кейіннен қаза тапқан қызметкерлердің басым бөлігімен кездесу өткізуді жоспарлаған.

Шабуылдан кейін күдікті автокөлікпен қашуға әрекеттенген. Көлікті 65 жастағы әйел басқарған. Ол күдіктінің туысы немесе жақын танысы болуы мүмкін. Полиция қуғаннан кейін екеуі де ұсталды. Тергеу аясында тағы бір адам қамауға алынған.

Полицияның мәліметінше, күдікті бұған дейін құқық қорғау органдарына белгілі болған. Алайда ол аса қауіпті немесе зорлық-зомбылыққа бейім адам ретінде тіркелмеген. Сондай-ақ оның қаруды сақтауға немесе алып жүруге ресми рұқсаты болмаған.

Тергеу жалғасып жатыр. Күдіктіні қамауға алу туралы мәселе 30 маусымда сотта қаралады.