Грузия президенті Михаил Кавелашвили Астанаға саммитке келді
Грузия президенті Михаил Кавелашвили Астанада өтетін RES 2026 халықаралық экологиялық форумына қатысу үшін Қазақстанға келді.
Саммит аясында Грузия президентінің пленарлық отырыста сөз сөйлеуі жоспарланған. Сондай-ақ сапар барысында Кавелашвилидің Қазақстан Президенті Қасым-Жомарт Тоқаевпен кездесуі өтеді.
Грузия президентімен бірге қоршаған орта және ауыл шаруашылығы министрі Давид Сонгулашвили, президент әкімшілігінің басшысы Кетеван Квиникадзе және сыртқы істер министрінің орынбасары Александр Хвтисиашвили келген.
Бұған дейін, сейсенбі күні Астанаға RES 2026 өңірлік экологиялық саммитіне қатысу үшін Тәжікстан президенті Эмомали Рахмон, Армения президенті Ваагн Хачатурян, Қырғызстан президенті Садыр Жапаров, Түрікменстан президенті Сердар Бердімұхамедов, Өзбекстан президенті Шавкат Мирзиёев және Әзербайжан премьер-министрі Әли Асадов келген еді.
RES 2026 саммиті 22–24 сәуір аралығында өтеді. Ірі халықаралық шара экология, тұрақты даму және өңірлік ынтымақтастық мәселелеріне арналған.
Кездесу қорытындысы бойынша елдер экология және тұрақты даму мәселелері бойынша бірлескен декларация қабылдайды деп күтілуде. Сонымен қатар, БҰҰ агенттіктерімен бірлесіп 2026–2030 жылдарға арналған өңірлік іс-қимыл бағдарламасын іске қосу жоспарланып отыр.
