«Қазақфильм» жер учаскесін сату туралы ақпаратты жоққа шығарады

Атап айтқанда, "Қазақфильм" Алматыдағы жер учаскесінің сатылып жатқаны және кіруді бақылау режимінің күшейтілгені туралы ақпаратты жоққа шығарды, сондай-ақ қазіргі уақытта киножобаларды қаржыландыруға қатысты деректерді нақтылады.

"Аталған учаскеде авариялық жағдайда тұрған ғимарат анықталды. Бұл киностудия мамандарының бірнеше рет жүргізген тексерулерінде расталды. Аумақтағы қауіпсіздікті қамтамасыз ету және жазатайым жағдайлардың алдын алу мақсатында «Қазақфильм» Алматы қаласы әкімдігінің өкілдерін тарта отырып, кешенді сараптама жүргізуді бастады. Сарапшылардың қорытындысы бойынша осы ғимаратты қауіпсіз пайдалану үшін қажетті шешімдер қабылданады. Жер учаскесі мен кешенді сату туралы барлық ақпарат жалған. Бұл жалған ақпарат әрі қарай таралған жағдайда сотқа жүгінуге құқығымыз бар. Қазіргі уақытта учаске мен ғимарат киностудияның меншігінде және сатуға шығарылмайды", - деді Қазақфильм өкілдері.

Киностудия "Қазақфильм" аумағына кіруді бақылауды күшейту туралы ақпараттар да шындыққа жанаспайтынын мәлімдеді.

"Қазақфильм" киностудиясының аумағындағы өткізу режимінің қатаңдатылуы туралы хабарламалар да шындыққа жанаспайды. Қолданыстағы өткізу жүйесі қызметкерлердің қауіпсіздігін қамтамасыз етуге және киностудия мүлкін қорғауға арналған. Мұндай шаралар әлемдегі барлық киностудияларда қалыпты тәжірибе болып саналады және ұрлық, өртеу және басқа да оқиғалардың алдын алу үшін қажет. Жақында енгізілген қауіпсіздік шаралары студия аумағында болған өрт пен қызметкерлерге жасалған шабуыл сияқты оқиғаларға жауап ретінде жасалып, студияда жұмыс істейтіндердің барлығын қорғауға бағытталған".

Сондай-ақ киностудия қазіргі таңдағы киножобаларды қаржыландыру туралы ақпаратты түсіндірді.

"Сонымен қатар, киножобаларды қаржыландыру туралы ақпаратты түсіндіруді жөн көрдік. 2023 жылы Ұлттық киноны қолдау мемлекеттік орталығы 18 жобаны өндіріске жіберіп, олардың 10-ын 70%-дан астам қаржыландырылды. Оның ішінде екі жоба 100% қаржыландырылды. Ал, қалған сегіз жоба 50%-дан төмен қаржыландыру алды, алайда олардың бірқатарына аралық төлемдер жасалды. Кейбір жобаларды қаржыландырудың кешігуі Қазынашылық комитеттің кеш қаржы бөлуімен байланысты. Сонымен қатар, кешіктірілу есептердің уақытылы тапсырылмауымен де байланысты, бұл келесі транштарды алу үшін қажетті шарт", - деді "Қазақфильм" өкілдері.

"Қазақфильм" көрінеу жалған ақпарат тарату заң бойынша жауапкершілікке әкеп соғатынын еске салды.