Қазақстан «Дружба» құбыры тоқтаған соң Германияға мұнай жеткізу бағытын өзгертті
Қазақстан Германияға «Дружба» мұнай құбыры арқылы жөнелтілуі тиіс мұнайды Ресей аумағы арқылы өтетін өзге бағыттарға қайта бағыттайды. Бұл туралы елдің Энергетика министрлігі мәлімдеді.
Министрлік дерегінше, 2026 жылғы мамырға арналған транзит кестесінің өзгеруіне байланысты Германиядағы Шведт мұнай өңдеу зауытына жеткізілетін 260 мың тонна мұнай көлемі қайта бөлінеді.
Оның ішінде 160 мың тоннасы Каспий құбыр консорциумы жүйесі арқылы, ал қалған 100 мың тоннасы Усть-Луга порты арқылы жөнелтіледі.
Ведомство бұл өзгерістер жылдық өндіріс пен экспорт жоспарына әсер етпейтінін атап өтті. Министрлік өкілі Әсел Серікпаеваның айтуынша, мұнайды қайта бағыттау жүк жөнелтушілермен келісілген және тек операциялық сипатқа ие. Қолданыстағы инфрақұрылым экспорттың тұрақтылығын толық қамтамасыз етуге мүмкіндік береді.
Бұған дейін Ресей 1 мамырдан бастап Қазақстан мұнайын Германияға Дружба мұнай құбыры арқылы жеткізуді тоқтататыны хабарланған еді. Астана ресми арналар арқылы мұндай ақпарат алмағанын айтқанымен, бейресми дереккөздер бұл мәліметті растаған.
Сарапшылар мұндай шешімнің себебі ретінде Мәскеудің Германияның Владимир Путин режиміне қатысты «достыққа жат» саясатына жауап қайтару әрекетін атауда. Берлин Ресейге қарсы санкцияларды қолдап, Украинаға қолдау көрсетіп келеді.
Айта кетейік, «Дружба» құбыры Қазақстан үшін негізгі экспорт арнасы емес. 2025 жылы бұл бағытпен шамамен 2 млн тонна мұнай тасымалданса, Каспий құбыр консорциумы арқылы 70 млн тоннаға жуық мұнай экспортталған.
Дегенмен, қосымша бағыттың тоқтауы да Қазақстанның мұнай сатудан түсетін табысының бір бөлігін азайтуы мүмкін.
