Коллекторлық агенттіктен 16 миллион қазақстандықтың жеке дерегі табылды
Жетісу облысында жүргізілген тергеу барысында коллекторлық агенттіктердің бірінен шамамен 16 миллион қазақстандықтың жеке мәліметтері сақталған база анықталды.
Тергеу деректеріне сәйкес, күдіктілердің иелігінде азаматтардың дербес ақпараттары жинақталған арнайы ақпараттық жүйе болған. Бұл жүйе арқылы адамдарды тегі, аты-жөні, әкесінің аты, жеке сәйкестендіру нөмірі (ЖСН) және ұялы телефон нөмірі бойынша іздеуге мүмкіндік жасалған.
Құқық қорғау органдарының мәліметінше, іс аясында үш адам ұсталды. Олардың тұрғылықты мекенжайлары мен жұмыс орындарында санкцияланған тінту жүргізілді.
Тергеу барысында компьютерлік техника, серверлік жабдықтар және мобильді құрылғылар тәркіленген.
Қазіргі уақытта азаматтардың жеке деректерінің қалай жиналғаны, пайдаланылғаны және үшінші тұлғаларға берілген-берілмегені анықталып жатыр.
Тергеу жалғасуда.
