НАТО бас хатшысы Марк Рютте Киевке келді

НАТО басшысының ресми өкілінің айтуынша, Рюттені альянсқа мүше елдердің елшілері бірге ертіп келген. Бұл іс жүзінде НАТО-ның саяси шешім қабылдайтын ең жоғары органы саналатын Солтүстік Атлантикалық кеңестің (North Atlantic Council) сапары болып отыр. Кеңес елшілер деңгейінде әдетте аптасына кемінде бір рет жиналады.

Қауіпсіздік мақсатында НАТО өкілдері сапар бағдарламасының нақты егжей-тегжейін жариялаған жоқ.

Алайда Украина сыртқы істер министрі Сибига әлеуметтік желідегі парақшасында Марк Рюттенің Украина президенті Зеленскиймен келіссөз жүргізетінін және бірқатар маңызды кездесулер өткізетінін хабарлады.

– Біз НАТО-ның Украинаға қолдау көрсету жолындағы бірлігі мен күшін жоғары бағалаймыз. Бұл біздің ортақ трансатлантикалық қауіпсіздікті қорғау ісіндегі маңызды ынтымақтастық, – деп жазды Сибига.

Қазіргі уақытта НАТО Украинаға түрлі бағдарламалар арқылы қолдау көрсетіп келеді. Соның бірі – PURL (Prioritised Ukraine Requirements List) бағдарламасы. Бұл механизм бойынша Еуропадағы одақтас елдер мен Канада АҚШ-тан қару-жарақ пен оқ-дәрі сатып алып, кейін оларды Украинаға жеткізеді.