Непалда апаттан 10 күн өткен соң туннельден Қытай азаматы тірі табылды
Непалда жойқын су тасқыны мен көшкіннен кейін 10 күн өткенде гидроэлектр станциясының туннелінен Қытай азаматы тірі құтқарылды.
Ол апаттан кейін туннельдерден аман шығарылған үшінші адам болды. Бұл туралы Reuters жазды.
Непал армиясының мәліметінше, Лу Хайтао есімді Қытай азаматы Upper Trishuli-1 гидроэлектр станциясының ұзындығы 225 метрлік туннелінен шығарылған.
26 тамызда өзеннің жоғарғы жағындағы мұздық опырылып, мұз, тас пен лай аралас алапат тасқын Гималай аңғарын басып қалған. Билік шамамен 900 адамның түрлі туннельдерде қалып қоюы мүмкін екенін мәлімдеген.
Құтқарушылар бір күн бұрын Upper Trishuli 3A гидроэлектр станциясының басқа туннелінен тағы екі адамды тірідей алып шыққан.
Дәрігерлер Лу Хайтаодан көзге көрінетін жарақат байқамаған, тек жеңіл гипотермия белгілері анықталған. Непал армиясы таратқан видеода құтқарылған азаматқа оны әскери госпитальға жеткізіп бара жатқан тікұшақта медициналық көмек көрсетілгені көрінеді.
Айта кетейік, Непалдағы апаттан кемінде 1 344 адам қаза тапқан. Су тасқыны Қытайдың Тибетімен шекаралас аймақтардағы үйлерді, көшелер мен мектептерді шайып кеткен.
Тағы 4 887 адам із-түзсіз жоғалғандар қатарында. Олардың 583-і – шетел азаматтары. Жоғалған шетелдіктер арасында қажылық сапармен келгендер мен таулы аймақтарда саяхаттаған туристер бар.
Қытайдың Синьхуа агенттігінің дерегінше, Тибет аумағында 31 адамның қаза тапқаны белгілі. Тағы 531 адам жоғалған, олардың арасында шетел азаматтары да бар. Тибетте із-түзсіз жоғалған шетелдіктер саны 261 адамға жеткен.
5 қыркүйекте құтқарушылар Непалдың Бетравати елді мекеніндегі үйден Чандика Кумари Шрестха есімді әйелді де тірі алып шыққан. Ол лай мен су басқан жерасты құрылысында қалып қойған.
Нувакот ауданындағы Майтхили казармасында жоғалған адамдардың туыстары жақындарының табылуынан әлі де үмітті. Олар туннельдерде қалып қоюы мүмкін адамдардың суреттерін қабырғаларға іліп, құтқару операциясының нәтижесін күтіп отыр.
26 тамыздағы табиғи апат Непалдағы соңғы жылдардағы ең ауыр апаттардың біріне айналды. Іздеу-құтқару жұмыстары әлі жалғасып жатыр.
