Қазақстан 2027 жылы алты әлем чемпионатын өткізеді
Қазақстан 2027 жылы спорттың бірнеше түрінен әлем чемпионаттарын өткізеді. Бұл туралы Президент Қасым-Жомарт Тоқаев мәлімдеді.
Мемлекет басшысының айтуынша, спорт елдердің халықаралық беделі мен абыройын арттыратын, сондай-ақ қоғамдық дипломатияны дамытатын маңызды құралға айналды. Қазақстан әлемдік деңгейдегі жарыстарды қабылдау арқылы спорттық держава ретіндегі орнын нығайтып келеді.
Келер жылы елде бокс, дзюдо, таэквондо, үстел теннисі және киберспорттан әлем чемпионаттары өтеді. Бұған қоса, шорт-тректен жасөспірімдер арасындағы әлем біріншілігі ұйымдастырылады.
Сондай-ақ көктемде Астанада УЕФА-ның 51-конгресі өтеді. Жиынға әлемнің түкпір-түкпірінен футбол қауымдастығының өкілдері қатысады деп жоспарланған.
Тоқаев спорттағы адал бәсеке қағидаттары Қазақстанның стратегиялық бағытының негізіндегі әділеттілік идеясымен үндес екенін атап өтті.
