Қазақстан футбол федерациясы сотта жеңілді: бұрынғы қызметкеріне 50 млн теңгеге жуық өтемақы төлейді
Қазақстан футбол федерациясы (ҚФФ) бұрынғы бас аудиторы Қамбар Омаровпен болған сотта жеңіліп қалды.
Сот федерацияны еңбек шартын мерзімінен бұрын бұзғаны үшін бұрынғы қызметкеріне 50 миллион теңгеге жуық өтемақы төлеуге міндеттеді. Бұл туралы Kazachkov offside Telegram арнасы жазды.
Қамбар Омаров Қазақстан футбол федерациясында 2025 жылдың қаңтарынан бастап жұмыс істеген. Оның ай сайынғы жалақысы шамамен 2,5 миллион теңге болған.
2026 жылдың сәуірінде оған штаттың қысқаруына байланысты жұмыстан босатылатыны хабарланған. Ал мамыр айында еңбек шарты бұзылған.
Бұрынғы аудитор штат қысқарту туралы шешімге дау айтпаған. Алайда еңбек шартында қарастырылған өтемақыны төлеуді талап етіп, сотқа жүгінген.
20 айлық жалақысын талап еткен
Сот барысында Омаровтың федерацияда бір жыл жұмыс істегеннен кейін жұмыс берушімен қосымша келісімге қол қойғаны анықталған.
Бұл құжат еңбек шартының мерзімін 2028 жылдың қаңтарына дейін ұзартқан. Сондай-ақ жұмыс берушінің бастамасымен қызметкер жұмыстан босатылған жағдайда, оған келісімшарт мерзімі аяқталғанға дейінгі барлық жалақысы төленуге тиіс екені көрсетілген.
Осы тармаққа сүйенген Қамбар Омаров федерациядан 20 айлық жалақысын, яғни шамамен 50 миллион теңге талап еткен.
Бұған қоса, ол төленбеген сыйақылар үшін тағы 20 миллион теңгеге жуық қаражат өндіруді сұраған.
Федерация қосымша келісім туралы білмегенін мәлімдеді
Қазақстан футбол федерациясының өкілдері талап арызды мойындамаған.
Олардың айтуынша, ұйым басшылығы қосымша келісімнің бар екенін білмеген. Құжаттың түпнұсқасы тек талапкердің қолында болған, ол enbek.kz мемлекеттік жүйесінде тіркелмеген және федерацияның жаңа басшылығымен келісілмеген.
Осыған байланысты ҚФФ қосымша келісімді жарамсыз деп тану туралы қарсы талап арыз берген.
Сотта маңызды айғақтардың бірі федерацияның бұрынғы бас хатшысы Давид Лорияның жауабы болды.
Ол аталған қосымша келісімге ҚФФ атынан өзі қол қойғанын растаған. Сондай-ақ құжаттың заңды түрде рәсімделгенін мәлімдеген.
Сот қандай шешім шығарды?
Астана қаласының соты Қамбар Омаровтың талап арызын ішінара қанағаттандырды.
Сот шешіміне сәйкес, Қазақстан футбол федерациясы бұрынғы қызметкеріне еңбек шартының аяқталуына дейінгі жұмыс істелмеген кезең үшін 50 миллион теңгеге жуық жалақы төлеуге міндеттелді.
Алайда Омаров талап еткен 20 миллион теңгеге жуық сыйақыны өндіріп беру туралы өтініш қанағаттандырылмады. Сот бұл төлемдердің ынталандыру сипатындағы қосымша ақы екенін негізге алған.
Сонымен қатар федерацияның қосымша келісімді жарамсыз деп тану жөніндегі қарсы талап арызы толықтай қабылданбады.
