Ресей әскері Украинаның бірнеше өңіріне жаппай соққы жасады
17 шілдеде Ресей Қарулы күштері Украинаның Харьков, Днепропетровск, Чернигов облыстары, сондай-ақ Одесса мен Николаев қалаларына зымырандармен, басқарылатын авиациялық бомбалармен және дрондармен шабуыл жасады.
Украина билігінің мәліметінше, шабуылдар салдарынан кемінде бес адам қаза тауып, 35-тен астамы түрлі дәрежеде жарақат алған.
Харьков
Харьков облыстық әскери әкімшілігінің басшысы Олег Синегубовтың айтуынша, Харьков қаласына жасалған зымыран соққысы салдарынан 40 жастағы ер адам қаза тапты. Тағы тоғыз адам, оның ішінде 2 және 7 жастағы екі бала жарақат алған. Шабуылдан қала орталығындағы тұрғын үйлер де зақымданған.
Сонымен қатар Ресей авиациясы Изюм қаласына басқарылатын авиациялық бомба тастаған. Салдарынан жеті адам, оның ішінде үш кәмелетке толмаған бала жараланған.
Днепропетровск облысы
Облыс басшысы Александр Ганжаның мәліметінше, бір тәулік ішінде өңірге шамамен 40 рет дрондармен және авиациялық бомбалармен соққы жасалған.
Шабуылдар нәтижесінде 48 жастағы ер адам қаза тауып, тағы 10 адам жарақат алған.
Чернигов облысы
Новгород-Северский қаласында дрон тұрғын үйге соғылған. Украина Төтенше жағдайлар қызметінің мәліметінше, бір отбасының бес мүшесі, оның ішінде 2009, 2014 және 2019 жылы туған үш бала зардап шеккен.
Одесса
Одесса облыстық әскери әкімшілігінің басшысы Олег Кипердің айтуынша, шабуыл салдарынан 77 жастағы зейнеткер қаза тапқан.
Сондай-ақ қаладағы порт инфрақұрылымы зымыран соққысына ұшырап, төрт адам жараланған. Өнеркәсіп нысандары мен бірнеше автокөлікке зақым келген.
Николаев
Николаев қаласында дрондар порт инфрақұрылымына шабуыл жасаған.
Облыстық прокуратураның мәліметінше, екі адам қаза тауып, шетел туы астында жүзетін үш азаматтық кеме зақымданған.
Сумы қаласы да шабуылға ұшырады
17 шілдеге қараған түні Ресей авиациясы Сумы қаласына кемінде бес басқарылатын авиациялық бомба тастаған.
Соққылар қаланың бірнеше ауданындағы азаматтық инфрақұрылымға тиген. Қала орталығындағы нысандар, көпқабатты әкімшілік емес ғимараттар мен басқа да құрылыстар зақымданып, көптеген ғимараттың терезелері сынған.
Украина билігінің мәліметінше, соңғы уақытта Сумы қаласы мен оның маңы күн сайын дерлік Ресейдің шабуылына ұшырап келеді. 15 шілдеде қалаға алты басқарылатын авиациялық бомба тасталып, үш адам қаза тауып, 21 адам жараланған. Сол кезде медициналық мекемелер, тұрғын үйлер, инфрақұрылым нысандары мен әкімшілік ғимараттарға елеулі зиян келген.
