Жазылу
Шерзаттың әпкесі баспаналы болды
Белсенді Димаш Қаматай әлеуметтік желідегі парақшасында марқұм Шерзаттың әпкесі Перизат Нұрымова көпшіліктің қолдауымен баспаналы болғанын хабарлады.
Шерзаттың есімі ел жадында қоғамдағы әділетсіздікке қарсы күрескен азамат ретінде сақталып қалды. Оның өлімі халық арасында үлкен дүрбелең тудырып, әлеуметтік желілерде кеңінен талқыланды. Шерзаттың жақындары мен оны қолдаушылар әділеттілік орнатуды талап етіп, оның отбасының жағдайына ерекше назар аударды.
Перизат Нұрымова бұған дейін баспана алу үшін қаражат жинап жатқанын айтып, оның б Қаржаубай Нұрымовқа қатысы жоқ екенін мәлімдеген болатын. Бұл ақпарат әлеуметтік желілерде кең тарады, және көпшілік Перизатқа көмек қолын созды.
Белсенді Димаш Қаматайдың айтуынша, қазақ халқының жанашырлығы мен бірлігі арқасында Перизат пен оның жұбайы Айғазы баспаналы болды.
"Бүкіл қазақ халқы қолдап, жанашыр бауырларымыз ортақ іске үлесін қосып, қазір алты баланың анасы Перизат пен оның жары Айғазы баспаналы болды. Сондықтан, қазақ халқына мың да бір алғысымызды білдіреміз", - деді Димаш Қаматай.
Перизат Нұрымова да барша халыққа алғысын білдіріп, олардың қолдауының арқасында жаңа баспанаға қол жеткізгенін атап өтті.
@dimash_kamatay Перизаттың отбасы үшін жаңа үй сатып алынды🇰🇿 Құрметті Қазағым! Бүгін біз ерекше әрі маңызды оқиға туралы бөлісуді жөн көрдік. Шерзаттың бауыры Перизаттың қайғылы жағдайдан кейін отбасы қиын кезеңді бастан өткерді. Қауіпсіздік мәселесі барлығымызды алаңдатты. Осыған байланысты біз оларға қолдау көрсету үшін жаңа үй сатып алдық. Бұл үй тек баспана ғана емес, ол – жаңа өмірдің бастауы. Алты баланың батыр анасы Перизаттың қолдауы болған сіздер. Бұл қадам олар үшін жай ғана баспана емес, болашаққа деген сенім мен жаңа өмірге қадам басуға мүмкіндік береді. Қоғамдық бірліктің маңыздылығын көрсету үшін, осындай жағдайда қолдау көрсету әрқайсымыз үшін маңызды. Біз Перизаттың отбасына қиын сәтте көмек көрсетіп, оларды жалғыз қалдырмайтынымызды білдіргіміз келеді. Соттың әділетті өткенін көріп, бауырларымыз тыныштық табар деп сенеміз. Бұл отбасы енді қуанышты күндерді ғана бастан кешеді деп сенеміз. Бұл бастаманы қолдаған барлық жанашырларға алғыс айтамыз! #казахстан #алашорда #оянқазақ #қазақстан #зашерзата #занурканат #әділеттіқазақстан #жаңақазақстан ♬ Өмір жайлы - Қуандық РАХЫМ
Бұған дейін меценаттар Талғардағы тағы бір отбасына үй алып беретінін мәлімдеген болатын. Осыған қатысты Қаржаубай Нұрымов бұл туралы хабардар екенін, бірақ баспана мәселесін өз күшімен шешуге дайын екенін жеткізді.
Айта кетейік, Талғар ауданында 16 жастағы Шерзат Болаттың өлімі қоғам арасында резонанс тудырды. Оны 4 қазанға қараған түні бір топ жігіт әке-шешесінің көзінше ұрып, пышақтап өлтіріп кетті. Қылмыс жасады деген күдікпен 11 адам ұсталып, уақытша ұстау изоляторына қамалды.
Бірнеше күннен кейін, 12 қазанға қараған түні Азат ауылында Шерзат Болаттың отбасының үйі өртенді. Бас прокуратура үйді өртеп жіберген жауаптыларды табуға уәде берді.
Кейін желіде «Хутор бригадасының» басшысы атанған Хасан Қасымбаев мәлімдеме жасады. Ол Талғар тұрғындарының өзі туралы жазған желідегі пікірлерін жалған деп атады. Содан соң Хасан Қасымбаевтың өзі ұсталып, екі айға қамалды. Бірақ ІІМ оның басқа іс бойынша қамалғанын мәлімдеді.
9 желтоқсанда Шерзаттың ағасы Нұрғанат Ғайыпбаевтың қайтыс болғаны белгілі болды.
Бірақ туыстары оның өз-өзіне қол жұмсағанына сенбейтінін мәлімдеді.
