Wildberries арапша жазуы бар Қазақстан туын сатылымнан алып тастады

Тудың үстінде исламдық шахада жазуы болған. Қазақстан заңнамасына сәйкес, мемлекеттік рәміздерді қорлағанға қылмыстық жаза қарастырылған.

Wildberries туды сатылымнан шұғыл түрде алып тастады

Әлеуметтік желілерде төрт ниқаб киген қыздың Қазақстан туын ұстап тұрған фотосы тарағаннан кейін қызу талқыға түсті. Кейіннен осындай туды Wildberries платформасында еркін түрде 5 мың теңге шамасында сатып алуға болатыны анықталды.

Компания ішкі тексеріс жүргізіп, бұл тауардың сатылымын тоқтату туралы шешім қабылдады.

"Тексеру нәтижесінде арапша жазуы бар ту сатылымнан алынды. Wildberries платформасында кез келген заңсыз әрекеттерге қарсы белсенді күрес жүргізіледі. Барлық сатушылар Қазақстан заңнамасына сәйкес тауарлардың талаптарға сай екенін растайды, және біз бұл талаптардың орындалуын мұқият қадағалаймыз", – делінген компанияның ресми хабарламасында.

Атыраудағы ниқаб киген қыздардың ісі

Бұған дейін Атырау қаласында ниқаб киген төрт қыздың арапша жазуы бар Қазақстан туымен түскен фотосуреті әлеуметтік желілерде тарап, үлкен дау туғызған еді. Тексеру нәтижесінде жалаудың Instagram-дүкеннен сатып алынғаны анықталды.

Атырау облысының полиция департаменті бұл іс бойынша мемлекеттік рәміздерді қорлау фактісі бойынша қылмыстық іс қозғады. Күдіктілер анықталып, полицияға жеткізілді. Қазақстан заңнамасына сәйкес, мұндай әрекет үшін айыппұл, қоғамдық жұмыс немесе бас бостандығынан айыру жазасы қарастырылған.