Жамбыл облысында ер адам атып өлтірілді: марқұмның туыстары Тоқаевқа үндеу жасады
Жамбыл облысында, туыстарының айтуынша, атып өлтірілген Дүкенбай Ахметтің жақындары Қазақстан Президенті Қасым-Жомарт Тоқаевқа үндеу жасады.
Марқұмның отбасы кісі өлтіру ісінің тергеуін Мемлекет басшысының жеке бақылауына алуды сұрап отыр.
Threads әлеуметтік желісінде жарияланған мәліметке сәйкес, қылмыс 1 тамыз күні түнгі сағат үш шамасында Тұрар Рысқұлов ауданындағы Луговое ауылындағы Пушкин көшесінде болған.
Туыстарының мәлімдеуінше, кісі өліміне ауданда әрекет етеді делінетін қылмыстық топ мүшелерінің қатысы болуы мүмкін. Сондай-ақ олардың айтуынша, қайғылы оқиғаға дейін белгісіз адамдар Дүкенбай Ахметке бірнеше рет қоқан-лоқы көрсеткен. Алайда бұл мәліметтер әзірге ресми түрде расталған жоқ.
Марқұмның отбасы осы уақытқа дейін құқық қорғау органдарынан оқиғаның мән-жайына қатысты толық түсініктеме алмағанын айтады. Жақындары істің жан-жақты әрі объективті тергелуін және кінәлілердің жауапкершілікке тартылуын талап етіп отыр.
Марқұмның артында жұбайы, бір ұлы мен қыздары қалды. Үндеуде айтылғандай, егде жастағы ата-анасы жалғыз ұлынан айырылған.
