Депутат Қазақстандағы байланыс сапасын сынға алды
Мәжіліс депутаты Марат Башимов Қазақстандағы үй интернетінің сапасын сынға алып, телекоммуникация саласында тұтынушылардың құқықтары бұзылып жатқанын мәлімдеді.
Бұл мәселе «Телекоммуникация нарығы мен деректерді өңдеу орталықтарын дамыту мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын бірінші оқылымда талқылау кезінде көтерілді.
Башимовтың айтуынша, телекоммуникация нарығын дамыту кезінде тек бәсеке мен операторлардың құқықтары туралы ғана емес, қарапайым пайдаланушылардың құқықтары туралы да айту қажет.
«Бұл салада азаматтардың конституциялық құқықтары, тұтынушылардың құқықтары жаппай бұзылып жатқанын бәрі біледі. Мен жолдың арғы бетінде тұрамын, тіпті үлкен пост жаздым, онда бәрі: үй интернеті жұмыс істемейді деп жазып жатыр. Сіздер бізге неге ертегі айтып отырсыздар?» – деді депутат премьер-министрдің орынбасары – жасанды интеллект және цифрлық даму министрі Жаслан Мәдиевке қарата.
Мәжілісменнің сөзінше, қазақстандықтар байланыс қызметі үшін ақша төлейді, бірақ сапалы интернетті әрдайым ала бермейді.
«Халықты сіздердің нарықтарыңызға кім кіретіні қызықтырмайды. Ол қызмет үшін ақша төлейді. Мен 15 мың теңге төлеймін, қалыпты интернет алғым келеді! Сіздер дәл осы тұтынушылардың құқықтарына тиісті деңгейде көңіл бөлмей отырсыздар», – деді Башимов.
Депутат министрлік тұтынушылардың мүддесін белсендірек қорғауы керек екенін, тек нарықты дамыту мен бәсекеге ғана назар аудармауы қажет екенін айтты.
Жауап ретінде Жаслан Мәдиев интернетке қолжетімділік азаматтар үшін базалық шарт екенін атап өтті. Ол депутаттың нақты жағдайын қарастыруды ұсынды және интернет мәселелері бойынша e-Otinish арқылы жүгінуге болатынын еске салды.
«Жалпы, біз мұны азаматтар үшін әр адамға жеткізілуі тиіс базалық жағдай деп есептейміз. Егер интернетке қатысты мәселе болса, әрдайым e-Otinish арқылы жүгінуге мүмкіндік бар. Біздің мемлекеттік орган оны бақылауға алады», – деді министр.
Мәдиев бұған дейін нақты жағдайдан хабарсыз болғанын, енді министрлік оны қарастыратынын айтты.
Қазақстанда байланыс пен интернет сапасына қатысты мәселе бірнеше жылдан бері талқыланып келеді.
