Шенеуніктер костюмін шапанға ауыстырды

Мариям МАҚСАТ

19.03.2021, 09:09

902

Атқамінерлердің шырттай болып костюм киіп, галстук тағып жүретініне көздің әбден үйреніп қалғаны рас. Әйтсе де оларға ою-өрнегі бар, ұлттық нақыштағы киімдер де жап-жақсы жараса кетеді екен. Павлодар облыстық «Jebe» қоғамдық бірлестігі өңір жұртшылығына «Ең әдемі киім – ұлттық киім» деген үндеу жолдап, бұл бастамаға жергілікті шенеуніктер де қолдау білдірді. Сөйтіп, жұмыс орнына әдеттегідей костюммен емес, шапан киіп келіп жүр.

Ақпан айының соңында «Jebe» қоғамдық бірлестігі 1 наурыздан бастап бір ай бойы жұмыста, қоғамдық орында, қысқасы, күнделікті өмірде ұлттық нақыштағы киімдерді киіп жүруге үндеу жариялады. Ұлттық құндылықтарды ұлықтап, ұлт руханиятына үлес қосуды мақсат тұтқан белсенділердің игі ісіне көпшілік бірден қосылды. Қалалық жерлердегі ірі мекемелердің ұжымдарын былай қойғанда, шалғайдағы ауылдың оқушылары, ұстаздары, дәрігерлері, мәдениет үйі, кітапхана, әкімдік қызметкерлері – бәрі бірден қолдай кетті. Шыны керек, бұған дейін қазақ пен өзге ұлт өкілдерінің саны теңесетін солтүстіктегі өңірде ұлттық сананы серпілтетін дәл осындай жоба болған емес. Сондықтан болар, үндеуге үн қосқандардың саны көп. Олардың қатарында қандастарымызбен қатар, өзге ұлт өкілдері де бар. Ұлттық киімдеріміздің әдемілігі сол – ол өзімізге де, өзгеге де жараса кетті. Бастысы, ою-өрнекті киімді заманауи үлгіге ыңғайлап, күнделікті өмірде де киіп жүруге болатыны дәлелденді.

Осы орайда, жебеліктердің үндеуіне шенеуніктердің қосылуы әрі таңғалдырды, әрі қуантты. Көптеген басқарма басшылары, аудан әкімдері мен олардың қол астындағы қызметкерлер мемлекеттік мекемедегі жұмыстарына шапанмен, жеңсізбен, қамзолмен келе бастады. Павлодар қаласының әкімі Ержан Иманслям да жиындардың барлығына шапан киіп барады.

– Мемлекеттік мекеме қызметкерлері арасында бұл акцияны мәдениет саласының қызметкерлері бірден қолдады. Мен де осы бастамадан тыс қалмай, өскелең ұрпаққа Наурыз мейрамын тойлау тарихын, ұлттық салт-дәстүрлер мен әдет-ғұрыптарды еске салып, заманауи түрде ұлттық құндылықтарымызды үйретуіміз қажет деп санаймын. Қазіргі таңда қамзолдар, шапандар сынды қазақтың ұлттық киімін кию үрдісі жақсы дамып келеді. Сол арқылы ұлттық мәдени құндылықтарымызды дәріптеуіміз қажет деп ойлаймын. ⠀

Қазақстан Тәуелсіздігінің 30 жылдығын мерекелеу жылы ұлттық құндылықтар мен мәдениет айы деп жарияланған наурыз айында қала тұрғындарын осы акцияға қосылып, өздерінің патриотизмі мен белсенді азаматтық ұстанымын көрсетуге шақырамын! – деді Ержан Иманслям.

Шаһар басшысы ұлттық үлгідегі киіммен түскен суретін жариялап, үндеуге үн қосуға шақырғаны сол еді, ілік іздейтіндер табылды. «Бұл шапанның бағасы қанша?», «Оны алғанша, аз қамтылған отбасыға көмектеспей ме екен?», «Біз де әкім сияқты жалақы алсақ, осындай шапан киетін едік», «Ұлттық киім киіп, сән көрсетіп жүргенше, мұз басқан жолдарды тазаламай ма» деген сынды пікірлер қарша борады. Қала әкімінің бастамасын  жөн санап, «Ұлттық құндылықтарды ұлықтау әкімнен басталуы керек», «Қазақы киім өзіне жарасып-ақ тұр», «Тек бір аймен шектелмей, ұлттық киімдерді жиі киіп, үлгі көрсетсе, шіркін» деген мағынадағы жазбалар да кездесті.

Бұл ретте жоғарыда аталған «Jebe» қоғамдық бірлестігінің Ұлыстың ұлы күні аясында өзге де тың жобаларды қолға алғанын атап өткен жөн. Мәселен, жаңа жылда ата-аналар балаларына Аяз атаны үйге шақырып, оның бірнеше минутқа бас сұққанына әжептеуір ақша төлеп, әуре-сарсаңға түсетіні белгілі. Ал жебелік жігіттер Қыдыр атаны шақырып, оның батасын алуға үндеді.

– Көрісу күнінен бастап, Ұлыстың ұлы күні, яғни 22 наурызға дейін Қыдыр атаны үйіңізге шақырып, балаларыңызды құттықтатып, батасын ала аласыздар. Бастысы – тегін. Қыдыр атаның қызметі ақшамен бағаланбайды. Ол келген шаңыраққа құт қонады. Себебі Қыдыр атаны ырыс пен құт дарытатын, бақ пен берекеге байытатын, ынтымақ пен бірлікке үндейтін батагөй қария ретінде білеміз. Қыдыр ата кез келген үйге бас сұға бермейді. Дастарханы баталы, шаңырағы аталы, жеті атасы жетелі, үй иесі орнықты, бала-шағасы құймақұлақ отауларға кіреді. Төріне шығып, батасын береді, – дейді қоғамдық бірлестік өкілдері.

Бірнеше күн ішінде-ақ Қыдыр атаны төрінен көруге асық отбасылардың қатары көп екені байқалды. Алғашқылары оны мейман ретінде қабылдап, балаларына Қыдыр атаның рөлін көрсетіп үлгерді.

Сонымен қатар аталмыш қоғамдық бірлестіктің бастамасымен үйді, мекемені қазақы нақышта безендіру, ұлттық ойындардың түрлері бойынша сайыстар ұйымдастырылуда.

Осылайша Павлодар жұртшылығы Әз Наурыздың қарсаңында бір серпіліп, рухани азық алатын болды. Ұлттық құндылықтарымызды ұлықтап, өткенімізді жаңғыртуға тамаша мүмкіндік туды. Тек ұлттық сипаттағы осындай ізгі істерді мемлекеттік мекемелердің өзі бастамай, қоғамдық бірлестіктерден үндеу күтіп отыратыны көңілге қаяу түсіреді. Ешкімге айтқызбай-ақ, акцияның жариялануын күтпей-ақ, жұмысқа шапанмен келуге болады емес пе?! Айтпақшы, Павлодар облысының әкімі Әбілқайыр Сқақо әзірше шапан киген суретін жариялаған жоқ. Әлде ол «Ең әдемі киім – ұлттық киім» деген ұстаныммен келіспей ме екен?

Тегтер: ұлттық киім тәлім тәрбие жаңғырту

ҰҚСАС ЖАҢАЛЫҚТАР

Еркежан АРЫН 15:52
«Қазақстан – бұрынғы Кеңес Одағы аумағында құрылған ірі бітімгершілік күштердің бірі»
М.СӘУЛЕБЕК 14:15
Министр штаб отырысын Шымкентте өткізді
Б.СӘРСЕНБИ 12:59
Түркістанда 25 тойхана жабылды
Миуа БАЙНАЗАРОВА 09:18
Қашпаған сиырдың уызынан дәметіп отырмыз
Сайт әкімшілігі 04.08.2021, 16:32
Алматы облысында демалыс күндері локдаун жарияланады
Айтбала СҮЛЕЙМЕНҚЫЗЫ 04.08.2021, 12:03
Қараусыз қалған аулалар, қоқыс басқан Қарағанды

Аңдатпа


  • «Жас Алаштың» 100 жылдығы Жамбылда жалғасты
    03.08.2021, 11:01
  • «Жас Алаш» газетінің мерейтойына орай бильярдтан турнир өтті
    30.07.2021, 12:31
  • "Жас Алаштың" 100 жылдығына орай Таразда бильярдтан турнир өтуде
    29.07.2021, 12:29
  • "Жас Алаштың" 100 жылдығына орай ұйымдастырылған бильярд турнирі тартысты өтті
    14.03.2021, 11:39
  • «Жас алаштағы» жасын жылдар
    15.07.2021, 10:58